Achegámonos a experiencias ante barreiras físicas con Fran Carreira Roca (Arquitecto, usuario e voluntario de GRUMICO, asesor de accesibilidade) e Mariluz Vázquez (Coordinadora técnica da Asociación ACADAR).

Nas experiencias presenciais e en espazos culturais, trátase esencialmente de barreiras físicas ou arquitectónicas que dificulten ou impidan o acceso de persoas con mobilidade reducida, tanto en cadeira de rodas como con outros graos menos severos. Isto inclúe tamén non contar con lugares de aparcamento, acceso ou ubicación preferente, o que desincentiva a súa asistencia e participación.

Os servizos auxiliares, como baños, puntos de atención ou zonas de restauración non sempre contan con alturas adecuadas, superficies ou elementos fácilmente aprehensibles (barandillas, pomos, taquillas, etc.)

Nalgúns casos, os espazos reservados poden converterse tamén en experiencias desagradables, por sentirse apartadas, estigmatizadas ou por non facilitar poder asistir acompañadas. Sexa por necesidade ou polo pracer de compartir esa experiencia cultural con persoas próximas, sexan amizades ou familia. Como calquera outra persoa.