Barreiras visuais

VISUAIS | AUDITIVAS | COGNITIVAS | FÍSICAS

Desde a baixa visibilidade ata a cegueira total, existen diferentes graos e situacións, sexan permanentes ou temporais que afectan á capacidade lectora de preto ou de lonxe, o campo visual ou a agudeza visual. Tamén debemos ter en conta aquí ás persoas que poida ter dificultades para distinguir as cores (daltonismo).

Segundo a ONCE, o 80% da información precisa para a nosa vida cotiá implica o órgano da visión, os nosos ollos.

Isto quere dicir que a maior parte das habilidades que posuímos, dos coñecementos que adquirimos e das actividades que realizamos apréndense ou realízanse a partir da información visual. Trátase, polo tanto, de facilitar alternativas para un acceso completo á información, contidos e experiencias culturais que agora ofrezamos só por canles visuais, tanto presenciais como dixitais.

Achegámonos a experiencias ante barreiras visuais, con Nieves García Longueira (Responsable do Servizo de Ocio e Tempo Libre de ONCE-Galicia) e Ángeles Miguélez (Educadora-Mediadora Rede Museística Provincial de Lugo).

Dificultades

As persoas con discapacidade visual atópanse, principalmente, coas seguintes dificultades:

De percepción, para identificar elementos, persoas ou lugares.
Para a orientación en novos espazos e detectar obstáculos.
Acceder a información textual que non teña tipografía adecuada (tamaño grande e con cor contrastada de fondo), transcrición en braille ou con sistemas de información sonora adicional.
Acceder a información gráfica ou audiovisual que non se ofreza de xeito alternativo, con sistemas de información táctil ou sonora.