Espazos e instalacións accesibles

Inclúe todas aquelas adaptacións vinculadas a accesibilidade arquitectónica, espacial e de mobiliario. Trátase dos elementos máis evidentes cando falamos de accesibilidade física, pero tamén visual: escaleiras, desniveis, portas de apertura manual, etc. Pero tamén mostradores, taquillas, mesas, puntos de información, máquinas expendedoras de tiquets ou de cobro, etc. Todas elas deben ter unhas dimensións, altura e materiais adecuados, ademais de contar con elementos de interacción fácilmente aprehensibles.

Podemos distinguir entre instalacións permanentes, como teatros ou museos, e instalacións efémeras, como os recintos de festivais.

Como ben indican desde a “Design for All Foundation”, unha medida de accesibilidade será imprescindible para chegar ao 10% da poboación, necesaria para facilitarlle a vida a outro 30%, pero tamén confortable para o 60% restante. Un exemplo moi sinxelo é pensar precisamente nun ascensor ou unha rampa nun espazo cultural. E o que estes elementos implican para persoas en cadeira de rodas, con mobilidade reducida, adultos maiores, mulleres embarazadas ou familias con carriños.

Máis aló de ter en conta a accesibilidade na adquisición de mobiliario ou equipamentos, calquera apertura dun novo espazo permanente ou proxecto de reforma require da avaliación e dun proxecto asinado por profesionais da arquitectura ou arquitectura técnica.

No caso de instalacións efémeras, a partir de determinados aforos, tamén é preciso contar con profesionais que poidan desenvolver e avalar un proxecto técnico integral, que teña en conta criterios de accesibilidade. Tamén falariamos aquí das condicións dos accesos e espazos de uso preferente.

Algunhas entidades sociais e vinculadas á arquitectura contan con servizos de asesoramento, como por exemplo a asociación coruñesa Grumico. Ademais de existir estudos de arquitectura ou empresas de produción técnica de espectáculos especializadas, que ademais nos permitan cumprir os requisitos legais e normativos.