Barreiras auditivas

VISUAIS | AUDITIVAS | COGNITIVAS | FÍSICAS

Desde a baixa audición (hipoacusia) ata a xordeira severa ou total, atopamos diferentes graos de discapacidade que implican á función anatómica e/ou fisiolóxica do sistema auditivo.

Dentro deste colectivo podemos atopar persoas que poden realizar lectura beizo facial e/ou que usan a lingua de signos. Pero tamén persoas que non, incluídas aquelas con resto auditivo, que empregan audífonos ou con implantes cocleares.

A discapacidade da fala, entendida como o déficit na comprensión, produción e emisión da comunicación verbal, así como trastornos da voz, debe terse en conta habitualmente dentro deste colectivo, pero tamén pode manifestarse en persoas con audición.

Ademais do acceso a expresións artísticas totalmente sonoras, como a música, a audición é tamén a principal vía pola que se desenvolve a comunicación na nosa sociedade.

Achegámonos a experiencias ante barreiras auditivas con Rubén Capelán (Técnico de accesibilidade e xestor cultural) e Montxo Solórzano (Picadiscos e activista musical).

Dificultades

As persoas con discapacidade auditiva atópanse, principalmente, coas seguintes dificultades:

Non poder acceder a información ou experiencias culturais que se ofrezan só por canles sonoras se non existen alternativas específicas, sobre todo visuais, como subtítulos adaptados ou uso de lingua de signos.
No caso das persoas que empregan audífonos (hipoacúsicas) ou implantes cocleares, o son ambiente pode resultar insuficiente ou desagradable para desfrutar plenamente dunha experiencia, especialmente en situacións moi ruidosas. Requírense adaptacións para conectar os seus aparatos aos recursos técnicos sonoros dos espazos culturais.